فطام الطفل من الرضاعة الطبيعية و الرضاعة الصناعية
ماهو الفطام
فطام الرضيع هي مرحلة يبدء فيها الرضيع بتنوع مصادر التغذية لديه بدلاً من الاعتماد الكلي على الرضاعة وهي تتم عند التعود من الطفل على ترك الرضاعة
إفطمي طفلك عن الرضاعة والرضاعة الصناعية بسهولة
يقدم لك د محمد دسوقي أخصائي طب الأطفال وحديثي الولادة
طريقة الفطام الصحيحة و الفطام الليلي للأطفال
و متى نبدء فطام الطفل عن الرضاعة والمقصود بالرضاعه هنا هي الرضاعه الطبيعى والرضاعه الصناعيه
فطام الرضيع
كيفية الفطام
١- بلاش تفطمي الطفل قبل مايتم سنة
٢- يفضل ان تكملي رضاعه لحد مايكون الطفل عنده سنه ونص او سنتين خاصتاََ للرضاعة الطبيعي
كل ماكانت الرضاعة الطبيعي أطول كل ماكانت الفوايد للطفل اكتر لان الرضاعة بتقوي مناعة الطفل ونمو جسمه بشكل صحيح
المقوله اللي بتقول ان الاطفال مش بيستفيدوا بالرضاعة الطبيعية بعد سنة المقولة دي خاطئه وغير صحيحة تماماً
الطفل بيستفيد من الرضاعة الطبيعية كويس جداً لحد السنة التانية
فالافضل تكملي رضاعة لحد سنه ونص اقل حاجه للرضاعة الطبيعي ولحد سن سنتين يكون ممتاز جدا
لكن في اسوء الظروف ماتفطميش الطفل إلا سنه مش أقل
٣- بلاش تكملي رضاعه بعد سنتين لان للاسف في امهات بترضع لحد سنتين ونص وثلاث سنين هنا ينطبق عليهم المقوله إن اي حاجه بتزيد عن حدها بتقلب لضدها
في الحالة دي شهية الطفل بتقل كتير ومابياكلش كويس ودا طبعاً هيأثر على نمو الطفل
ما هي الاشهر التي يحرم فيها الفطام ؟
لا يوجد شهر محدد للفطام في الشرع لكن ماتفطميش الطفل في أيام البرد الشديدة او ايام الحر الشديدة
٤- أفضل ايام الفطام هو فصل الربيع وفصل الخريف
لان في الشتاء بيحتاج يبقى في خضنك عشان يتدفى وفي الصيف الطفل بيحتاج كمية سوائل كتيرة عشان الحرارة العالية والرضاعة بتدي الطفل جزء كبير جداً من إحتياجاته من السوائل لكن في الجو المعتدل هتقدري تفطمي من غير الطفل ما يتعب منك
٥- بعض الامهات بتربط بين الفطام وبين التوقيت العربي الكلام دا مالوش اي سند علمي
ماهي الطريقة الصحيحة لفطام الطفل
هنفطم الطفل ازاي
- الطريقة الاولى هي الفطام المفاجئ وهنا بتوقفي الرضاعة مرة واحدة بشكل كامل تماماً في بعض الامهات بيفضلوها لانها هتتعب يومين ثلاثة وخلاص
لكن الطريقة دي هتبقي محتاجه حد يكون موجود معاكي يساعدك وأفضل شخص يكون موجود معاكي هو الأب لان الطفل قريب منه ومايبقاش معاكي وقدامك كتير لان طول مالطفل شايفك وشامم ريحتك هيبقى عاوز يرضع وعمال يعيط كتير
فحاولي ماتبقيش قدام الطفل بشكل متكرر فخلي الاب يبقى موجود ويشغل الطفل ويشتت إنتباهه ويلاعبه ويأكل الطفل على مدار اليوم
دا غير انك لازم تجهزي له بعض الألعاب الجديدة ويكون فيها ألوان مختلفة عشان تلفت نظره وتجذبه ليها
دا غير إنك لازم تحضري اكل الطفل بحيث يكون شكله جميل وجذاب ممكن تشكليه زي الرسوم الكرتونية عشان ياكله ويشبع فابالتالي هيقلل العياط الناتج عن الجوع
ويمكن كمان ان الاب يخرجه خروجات ترفيهيه بسيطة بحيث يلهيه عنك شوية
مميزات الطريقة دي ان الفطام هنا بيبقى سريع كام يوم وخلاص
لكن عيوبه ان الام هتتعب شوية نتيجة تحجر الثدي نتيجة الفطام المفاجئ
- الطريقة الثانية هي الفطام التدريجي وأمهات كتير بتفضلها ويعتبر أفضل طريقة لفطام الأطفال وهنا الأم بتفطم الطفل على مرحلتين المرحلة الأولى وهي الفطام النهاوي وهنا الأم بتبتدي تقلل عدد الرضعات بشكل تدريجي في خلال النهار لحد ماتوقف الرضاعة تماماً خلال النهار وتعتمد فقط علي الاكل وتخلي الطفل يرضع فقط خلال الليل او وهو نايم
وهنا فترة الفطام النهاري يبقى بالتدريج يعني وانتي بتقللي الرضاعة بتاعة الطفل في العدد وتستبدلي مكانها الاكل والافضل تزودي عدد الوجبات للطفل اللي هياكلها بحيث مايحسش بالجوع ابدا ويفضل دايماً شبعان ومايطلبش الرضاعة ويعيط
مرحلة الفطام النهاري بتبقى سهلة في معظم الامهات المشكلة بتبقى في الفطام الليلي خصوصاً مع الاطفال اللي مابتعرفش تنام إلا وهما بيرضعوا عشان كدا في خطوات لازم نعملها في الفطام الليلي
طريقة فطام الطفل من الرضاعة الطبيعية في الليل
وهي إن الطفل لازم ياخد وجبة عشاء مشبعة وجبة تشبع الطفل وتفضل موجودة في الجهاز الهضمي فترة ذويلة تخلي الطفل ينام فترة طويلة من غير مايحس بالجوع الخطوة دي مهمة جدا إن الوجبات المشبعة بنقدر نقدمها للطفل في وجبة العشاء
كمان بفضل نعطي الوجبة دي للطفل قبل ماينام بنص ساعة او ساعة بالكتير عشان مايلحقش يهضمها وتقلل وقت الشبع أثناء النوم
الخطوة الثانية يفضل إعطاء الطفل قبل النوم حمام ماء دافئ دا بيخلي الطفل يسترخي تماما وينام فترة اطول من غير مايصحى ويقلق
ولو الطفل بينام جمبك لازم تفصلي الطفل في سرير لوحده لان لان طول مانتي جمبه وشامم ريحتك هيطلب الرضاعة من الافضل ينام بعيد عنك في مكان في إضادة خافته
كمان حضري كوب ماء بجانب الطفل بحيث لو قلق بليل وعاوز يرضع خلي الأب هو اللي يدي الطفل الماء بدل الرضاعة وانتي تكوني بعيد لان لو شم ريحتك هيصحى ويصحصح لان الطفل بيبقى دايخ او مدروخ اول ماهيشرب اي حاجة سايلة ممكن ينام وضروري تدي الطفل يشرب مو الكوباية ممنوع تديه بالببرونة لاننا عاوزينه ينسى الرضاعه تماماً سواء رضاعة طبيعية أو رضاعة صناعية
الطفل لازم يتعود ان الاكل هيكون بالمعلقة والشرب بالكوب
بعد كم يوم يتعود الطفل على الفطام ؟
وهنا الفطام بيتم في خلال اسبوع والطفل ينسى الرضاعه بشكل نهائي
أشهر الأخطاء التي تتم من الام بعد الفطام إن الام تبدء تستجيب لزن الطفل وترجع ترضعه تاني ماتعمليش الخطاء دا يومين ثلاثه والموضوع هينتهي
من الاخطاء كمان ان الام تدي الطفل عصير بليل ودا خطأ لان لو الطفل اتعود على دا ودي مشكله
عودي طفلك إن طول ماهو نايم مش هياكل ولا هيشرب عشان يتعود على النوم الصحيح اللي المفروض يتعود عليه
كيفية تجفيف حليب الثدي
في بعض الادوية بتجفف حليب الثدي زي حبوب تنشيف الحليب بعد الفطام لكن لا أفضل إستخدامها على الإطلاق
عاوزه حليب الثدي يجف وينشف خلي الموضوع يحصل بشكل تدريجي أول حاجه لو بتاخدي اي حاجه مدرة للحليب وقفيها من أدوية مدرة للحليب أو أعشاب مدرة للحليب
كيف اتخلص من الم الثدي اثناء الفطام ؟
إعملي كمدات ماء بارد على الثديين ٥ او ٦ مرات في اليوم
كل مرة تضعي فوطة او منشفة مبلولة بالماء البارد علي الثديين لمدة ١٠ دقائق مع التكرار ٦ مرات في اليوم
دا بيقلل جدا من إفراز حليب الثدي
ولو حسيتي بألم في الثدي وفي الجسم يمكنك أخذ أي مسكن يحتوي على الباراسيتامول زي السيتال او الأدول او البانادول أقراص فهي آمنه في الاستخدام يمكنك اخذ قرص كل ٦ ساعات
أخطاء الفطام من الرضاعة
وهناك بعض الأخطاء الشائعة من الامهات وهي تعصير الثدي بالشفاط العادي او الكهربائي وهذه غلطة كبيرة لان الشفط بيزود إدرار الحليب فهنا الموضوع هيطوول أكثر أو هيزيد أكثر .