طريقة عمل بسكوت صحي حادق بالشوفان
افكار لانش بوكس بسكويت حادق صحي ولذيذ بالدقيق الأسمر
هيبقى فطار مثالي مع كوباية شاي او لبن
وكمان ينفع يتاخد في الانش بوكس خفيف مفيد وطعمه يجنن
بسكوت صحي بجد حلو قوي تقدميه في الفطار او عشا او في اللانش بوكس الولاد مع السندوتشات بجد خطير جداً
مش قادرة اقولكوا هي حلوة قد ايه بجد لذيذة قووي
طبعاً نقدر نقدم معاه لبنه او جبنة بزيت الزيتون مع شاي او شاي بلبن هيبقى تحفة جداً يلا مستنين إيه عاوزاكم تجربوه وتعملوه
انا بصراحة حبيته جدا لانه وصفة سهلة وسريعة التحضير في البيت
وبمكونات كلها إقتصادية مش هتكلفك حاجة
مقادير البسكوت الحادق الصحي
- نصف كيلو دقيق اسمر
- ٢ ملعقة كبيرة سمسم
- ٢ ملعقة كبيرة حبة البركة
- ملعقة كبيرة زعتر
- ملعقه كبيره سكر
- ملعقة صغيرة ملح
- قليل من الشوفان
- ملعقة صغيرة بيكنج بودر
- نصف كوب زيت
- وكوب سمنة او زبدة سايحة
- ملعقه صغيره خميرة
- نص معلقة صغيرة صلصة
طريقة عمل بسكويت صحي للدايت
- في وعاء عميق هنضع جميع المكونات السابقة من دقيق
- وسمسم وحبة البركه والزعتر والسكر والملح والبيكنج باودر
- طبعاً ينفع نستبدل الدقيق الأسمر بالابيض لو مش متوفر
- ونقلبهم مع بعض كدا بقى عندي خليط جاف منكه بالسمسم والزعتر وحبة البركه
- هنحط الزيت والسمنة هبتدي اخلطهم مع بعض كويس قوي
- وافرك كدا الدقيق مع المقادير لحد مايبقى زي الرملة المبلولة
- هنجيب نص كوباية ماية دافية ونحط عليهم الخميرة
- وهنحط عليها الصلصة ودي إختياري هتديكي طعم حلو قوي ولون حلو للبسكوت
- وبعدين هضيفهم على الخليط بتاعي وابتدي اخلطهم من غير ماعجنهم
- يعني يادوبك ادخل المكونات مع بعض واخلطهم لغاية مايبقى القوام يقدر يتشكل
- هغطيهم واسيب العجينة ترتاح نص ساعة
- بعدها نبدء نشكل العجين وندهن صاج المونيوم بالزيت
- بعد كدا ناخد نص العجينة ونفردها على مفرش بلاستيك
- وندهنه زيت
- نفرد عليه عجينة البسكوت بسمك نص سم تقريباً ونرش عليه شوية شوفان
- نبتدي نقطع عجينة البسكوت الحادق بقطاعة البسكوت
- او كوباية
- وبعد كدا نرص البسكوت في الصينية المدهونة زيت
- ندخل صينية البسكويت الحادق فرن متسخن من قبل على حرارة ١٨٠ درجة
- لحد مالبسكوت الصحي ياخد لون ونطلعه من الفرن
- نرص البسكوت الصحي في طبق التقديم
- وبالهناء والشفاء