طريقة الفطير الشرقي الحادق
يعتبر الفطير الشرقي من أنواع الفطائر الشهية واللذيذة سواء كان حادق أم حلو
الفطير الحادق الشرقي بأسهل طريقة والنتيجة هايلة بشوية مايه ودقيق مش هاتكلوه من بره تاني احلى فطير
مافيش فرق بين الفطير العادي والشرقي غير ان الفطير العادي الحشو بيبقى جوه او من غير حشو والشرقي بيبقي محشي من جوه وبره زي وش البيتزا
مقادير الفطير الشرقي
- كيلو دقيق ٧ كوب
- ملعقة كبيرة سكر
- ملعقة صغيرة ملح
- ماء
- زيت للفرد
- ٨ ملاعق سمنة للدهن إختياري
- إختيارات حشو الفطير
- جبنة موتزاريلا
- شرائح فلفل
- شرائح طماطم
- زيتون اسود
- بسطرمة
- لحمة مفرومة
- تونة
- هوت دوج
طريقة عمل الفطير الشرقي الحادق
- في وعاء عميق هنضيف الدقيق وعليه السكر والملح ونقلبهم
- بنضيف المايه بالتدريج مع العجن هنحتاج من كوبيتين ل كوبيتين ونص
- نفضل نلم العجين لحد ماتتلم معانا وتبقي ولا ناشفه ولا طرية
- بحيث تكون ناعمة ويفضل تعجنيها على سطح املس زي الرخامة
- اول ماتكون العجينة ناعمة وماتكونش مشققه
- وهنلاحط انها بتلزق شوية في ادينا ودا عشان مافبهاش ماده دهنيه
- نحطها في طبق ونغطيها بإسترتش أو بفوطة نضيفة
- لمدة ١٠ دقائق أو ربع ساعة ترتاح
- بعد كدا بنفردها على سطح املس بشكل إسطواني
- ونقسمها إلى قطع متساوية ونكور كل قطعة ونلمها من تحت
- ونجيب صينية ندهنها زيت ونضع فيها كور العجين وندهن حواليها كمان زيت
- ودا عشان كور العجين ماتلزقش في بعض بحيث يتغلف كله بالزيت
- ونقدر نغطيه بإسترتش ونعينه في الثلاجة لتاني يوم
- نسيب العجين ترتاح ساعه على الأقل او ممكن نعملها من بليل ونسيبها ترتاح لتاني يوم في الثلاجة
- نفرد كوره من العجين علي سطح مدهون زيت
- افردي العجين بالنشابه او بإديكي على قد ماتقدري
- بحيث يكون سمك العجينة رقيق جداً ولو اتقطع منك عادي
- بعد مافردنا العجين هندهنه سمنة بلدي او زيت لو مش متاح سمنه ونطبقه بشكل مربع
- ونحطه في صينيه مدهونه زيت ونسيبها ترتاح شويه
- ونرجع نكمل فرد في باقي كور العجين
- ونطبقه ونعمل باقي العجين بنفس الخطوات ونطبقه ونحطه في اصينيه يرتاح
- ينفع كمان تعينيها يوم او يومين في الثلاجة لما تستخدميها
- نجيب صينيه مقاس من ٢٤ - ٣٠ وندهنها زيت
- ونفرد اول عجينة عملناها وطبقناها على مقاس الصينية
- ونفرد الحشوات المختلفة فوقها من قطع طماطم وفلفل وزيتون وجبنة
- طبعاً تقدري تحشي الفطير الشرقي بالسجق او البسطرمة او التونة او اي حاجة بتحبيها
- بتجيبي عجينة تانيه وتفرديها على سطح املس
- بحيث تاخد شكل ومقاس الصينية بس اكبر شوية
- ونفردها فوق الحشوه وندخلها تحت الطبقه الاولى من العجين ونقفلها
- تقدري ترشي طبقة من الجبنة الموتزاريلا
- وينفع كمان نفرد طبقة من الزيتون والحشوه على الوش زي البيتزا
- او ندهنها كاتشب أو صلصة بيتزا عشان تديها لون
- نكرر الطريقة في كذا صينية لحد ماتخلص الكمية
- ندخل صينية الفطير الشرقي الفرن على أعلى درجة حرارة
- ودا عشان يورق ويتنفخ ويستوي من جوه وماينشفش
- ممكن تغطي الفطير اول مايطلع من الفرن بورق فويل او فوطة
- عشان تبقى طرية وماتنشفش
- وبالهناء والشفاء
يسعدنا تعليقك